Non sei como se fixo coa miña dirección de correo electrónico, pero o outro día recibín unha carta do presidente de Iberia na que quería pedirme perdón pola convocatoria de folga en Nadal, mentres se lamentaba de que a compañía perdía un millón de euros ao día. Non adoito usar moito o avión, pero a última vez paguei polo billete de volta en Iberia o triplo do que me custou o de ida nunha compañía low cost e aínda que é verdade que me sentín máis seguro no voo de regreso, iso non implica que vexa lóxica tal disparidade de prezos. Pero os queixumes do presidente de Iberia, que por certo non informaba de que o seu soldo rolda tamén o millón de euros ao ano, parecen ter efecto e os sindicatos xa anunciaron a desconvocatoria do paro por “respecto” aos usuarios nunhas datas tan sinaladas. O argumento soa tan hipócrita como o que usou na súa misiva o directivo da compañía, xa que nunca antes nin pilotos nin controladores nin maleteiros tiveron a máis mínima compaixón polos pasaxeiros que quedaban tirados nun aeroporto ou que tiñan que renunciar ás súas vacacións por culpa dun tira e afrouxa salarial. Os traballadores de Urbaser anuncian agora unha folga tan ou máis desagradable que un bloqueo aéreo, xa que van deixar de recoller o lixo en Nadal nas cidades onde levan este servizo porque comité e empresa non dan pactado unha suba salarial. Ao usuario, indefenso ante uns e outros, só lle queda o dereito á pateadura ou recordar aquela frase do xenial Fernando Fernán Gómez: “¡Á merda!”.