A feira
Mércores, 4 de Febreiro, 2015Se cadra moitos coma min pensaban que nunha cidade que durante séculos e ata antonte estivo controlada polos bispos e que se gaba de ter a única catedral onde está exposto permanentemente o santísimo sacramento ía desatarse unha polémica relixiosa pola celebración dun salón erótico onde tamén haberá exposición permanente de carne e fieis fitando cara os altares do pecado capital que máis cartos xera nos nosos días.
Pero nada diso, porque de momento só coñecemos o comunicado dun traballador social que compara o evento cunha feira onde a muller se presenta como mercadoría, mentres nas rúas tampouco se palpa moito morbo polo evento, se cadra porque Pandora e o seu can xa deixaron vacinados hai dúas décadas aos lugueses máis veteranos contra calquera sorpresa sexual, mentres que os mozos teñen agora na rede todo canto un se pode imaxinar e máis.
Será por iso que nin sequera se chegou a cuestionar, como ocorrera hai tres anos en Ferrol ou en Xixón, o uso dunha instalación pública como é o Pazo de Feiras para acoller un evento deste tipo, e que nos casos citados levou ás institucións a anular os eventos. Aquí en Lugo, desde os tempos en que María Alvarado poñía o grito no ceo polas rapazas que saían lixeiras de roupa na portada de La Hoja del Lunes, xa ninguén lle pon pegas ás cerimonias de exaltación do sexo, e menos cando ameaza neve.