Era de esperar tendo en conta cara a onde camiña un Estado autonómico que lonxe de conseguir o reequilibrio territorial fomenta as desigualdades. O último ataque ao que se veu en chamar sanidade pública universal denomínase catálogo de medicamentos, mediante o cal a Xunta, co beneplácito do BNG, acábase de cargar unha listaxe de fármacos do que si poderán dispor o resto de cidadáns españois, e que virán ser substituídos por xenéricos que, segundo se alega desde a institución recortadora, teñen o mesmo efecto. Claro que se o Ministerio de Sanidade anuncia un recurso de inconstitucionalidade á medida por considerar que mina os dereitos dos galegos, sería bo reivindicar polo menos os protectores estomacais de marca dentro do catálogo, para poder tragarnos sen problemas de dixestión os argumentos da conselleira de Sanidade.
Que non chega o diñeiro para pagar a factura dun servizo cada vez máis custoso sabémolo todos e que o copago de consultas e medicamentos ata polos pensionistas témolo ao virar a esquina os españois tamén, pero se un galego non pode obter no seu médico do seguro as mesmas medicinas que un asturiano ou un aragonés, a iso chamámoslle discriminación; aquí e en Torreciudad.