O Arde Lucus MMIX voltou a ser un exitazo que da idea das gañas de festa que teñen os lugueses logo dun inverno de nevaradas e crise. A mobilización popular está a desbordar as previsións e xa hai quen pensa que o acontecemento ata merece un día festivo local. O Entroido, por moi tradicional que fose no seu día, está a perder tirón fronte á festa romana, que é o auténtico Carnaval de verán para Lugo. Señores do Concello, vaiano valorando; os tempos e os costumes mudan e se vostedes foron quen de idear e impulsar esta gran idea, aposten por ela.

En canto ao espectáculo do circo, non estaría mal ir mudando o guión ou a compañía, que se repite ano tras ano. O cheo está asegurado, pero aínda así apetece ver algo novo.

En Lugo levan meses preparando a que leva camiño de convertirse en referente no calendario de festas de reconstrución histórica, o Arde Lucus. Como se dun concerto de U2 se tratase, en tres horas esgotáronse as entradas de tribuna para o circo romano e as modistas ou deseñadoras locais, segundo se pague, atoparon un filón nestes tempos de crise.

O caso é que a cidade das murallas está conseguindo redescubrir o seu pasado máis esplendoroso, aquel que chegou da man dun imperialismo que suxugou pero tamén formou aos habitantes dos castros. Hai dezasete séculos Lugo tiña unhas infraestruturas envexables e os seus habitantes podían desplazarse para comerciar ata outras cidades do noroeste. Hoxe as obras son máis difíciles de conseguir e os tempos de execución son agotadores. Menos mal que agora os lugueses contan cun tribuno no foro, o lugués José Blanco, que di que será capaz de cumprir todos os compromisos adquiridos.

Pero o que de verdade conta é que, segundo o Concello de Lugo, a celebración esta fin de semana do Arde Lucus vai deixar na cidade luguesa uns seis millóns de euros extra e, o que é máis importante, unha carga de autoestima e de concienciación da importancia que ten gabarse da historia propia, aínda que no seu tempo fose importada.