Posts etiquetados ‘Wert’

‘Cero patatero’

Mércores, 4 de Decembro, 2013

A España non lles saen as contas e se cadra o problema estea enquistado dende a escola. Acaba de amosárnolo o informe Pisa, que mide o nivel dos alumnos de 15 anos de 65 países en ámbitos como o cálculo, a lectura ou as ciencias, porque, segundo a última estatística, os españois están á cola dos escolares da OCDE en Matemáticas.

E como non se nos dan ben os números, non nos debe estrañar que desde o Goberno se informe do ben que evoluciona o emprego no país alegando unha baixada do paro nunhas 2.400 persoas en novembro, cando nese mesmo mes desapareceron uns 66.000 cotizantes á Seguridade Social.

Di o informe Pisa que en España andamos mal de estudantes excelentes e sóbrannos mediocres, unha situación que se repite coa clase política, porque desde que comezou a crise non vimos a ningún Goberno capaz de aportar solucións intelixentes e o único que aplicaron foron as teses dos alumnos avantaxados desa Europa que nos dirixe de facto.

Seica reforma educativa do ministro-cadáWert pretende solucionar os males que afectan ás nosas aulas, aínda que xa o dubido logo de escoitar á ‘número dous’ de Educación, Montserrat Gomendio, dicindo que investir máis diñeiro non vai mellorar os resultados no vindeiro informe Pisa. Mesmo penso que a cúpula ministerial podería acabar levando aquela nota que lle daba o expresidente Aznar ao PSOE: «Cero patatero».

Orgasmus

Mércores, 6 de Novembro, 2013
Non sei se o programa Erasmus fai máis Europa que a Champions League, pero logo de 26 anos de vixencia a lo menos ten facilitado a máis de tres millóns de universitarios a oportunidade de estudiar fóra dos seus países de orixe, unha posibilidade á que ata o xurdimento desta iniciativa só podían acceder fillos de familias acomodadas.
A popularización destas becas e programas do tipo Españoles por el mundo, onde os mozos aparecían de troula nas cidades a onde foran estudar, acabaron por trivializar o fenómeno Eramus e ata algún chegou a rebautizarlo como Orgasmus, logo de tomarse ao pe da letra que era un programa de intercambio. Se cadra o ministro Wert pensou que esa imaxe distorsionada lle serviría para xustificar un recurte máis no seu departamento e, como se fan as cousas que un non se atreve a anunciar, publicou unha orde no BOE na que decretaba, co curso iniciado, que moitos erasmus se quedarían sen a pírrica axuda de 150 euros para compensar os gastos de desprazamento.
Pero a crítica á medida non lle veu esta vez a Wert de onde sempre, da pertinaz oposición, se non das súas propias filas, onde moitos dirixentes populares teñen fillos beneficiarios desas bolsas. Por iso a rectificación non se fixo esperar e, logo dun estirón de orellas da cúpula do PP, anunciaba a cancelación da orde de Educación. Mágoa que non haxa na UE un programa de intercambio de ministros.