Posts etiquetados ‘redes sociais’

Interacción

Xoves, 6 de Marzo, 2014
A aportación das redes sociais máis interesante para os xornalistas é a inmediatez do contacto co lector ou espectador crítico. Os xornais cáseque naceron xa con opinións dos lectores, para os que se acabaron abrindo seccións chamadas cartas ao director e que axudaron a implicar á audiencia na labor de facer un diario dinámico e con esas pequenas novas ou opinións persoais sobre temas de actualidade.
Pero primeiro os foros ou comentarios en publicacións dixitais e logo as redes sociais acabaron por crear unha intercomunicación tan áxil entre o medio e o receptor que mesmo asusta aos profesionais, que ven ameazado o seu medio de vida co que se está dando en chamar xornalismo cidadán.
Sen embargo, esta inquedanza queda amortiguada cando os administradores das contas de internet constatan que, ao igual que ocorre coas cartas ao director, os lectores críticos e interactivos son minoría, se cadra por preguiza, timidez ou prudencia, pois a máis dun xa lle ten causado un disgusto algún improperio lanzado á rede, pensando que o facía desde o anonimato.
Pero o novo escenario de interacción tamén está a afectar os xornalistas, que poden respostar en segundos ao lector. Sen embargo, un libro de estilo dun xornal mesmo recomenda ao redactor contar ata vinte antes de replicar un comentario crítico, se cadra para que non acaben mordendo o anzó da provocación.

Téñome que posicionar

Mércores, 5 de Decembro, 2012

Un experto en comunicación dixital acaba de certificar algo que xa sabía, pero me negaba a recoñecer: estou mal posicionado en internet. A principal causa deste desapego á Rede reside no meu descoñecemento das reviravoltas de San Google e unha escasa actividade nesas redes sociais que cada vez máis acaparan o noso tempo de lecer.

A forma e, sobre todo, a nosa capacidade para poñernos en primeira fila e ser os primeiros en ofrecer o produto xa predomina sobre o fondo, o que pode acabar por converter os medios de comunicación en simples colectores de información, sen personalidade e carentes dese protagonismo social que no seu día chegou a identificalos como o cuarto poder.
O pulso da actualidade tómase xa en menos de 140 carácteres e os que se resistan a entrar na rolda corren o risco de acabar como outsiders da información, cun público minoritario e incapaces de influír na opinión pública.

A nosa audiencia é agora ilimitada e xa nos dá vertixe só pensar que o que deu en chamar reputación en internet poida verse lastrada por un comentario mal calculado ou por unha falta de reflexos.

O meu propósito para o ano novo será posicionarme mellor na Rede e seguir atento a calquera cambio ou evolución. Claro que o resto, a folla en branco, seguirá sendo o reto diario máis apaixonante.