Archivo de Outubro, 2011

Parón na industria do lume

Mércores, 26 de Outubro, 2011
O máis eficaz dos plans contra incendios da Xunta de Galicia púxose en marcha o domingo pola tarde. Utilizou os medios máis efectivos cos que conta, a borrasca do Atlántico, e atacou de raíz os lumes que durante as últimas semanas arrasaban os montes abandonados da Galicia interior e aos escasos e anciáns veciños que viven na súa contorna. Atrás quedaban xornadas de medo, desesperación e rabia dos que confiaban en ver crecer plantacións de árbores encamiñadas a pagar hipotecas de fillos e netos ou a axudar á maltreita economía duns xubilados coa paga media máis baixa de España.
Coa chegada da proverbial chuviscada, tamén bota o peche a industria do lume, que cada ano devora os orzamentos da Consellería de Medio Rural para contratar peonadas, carrocetas, avións e helicópteros que non terían razón de ser se houbese esa xestión eficaz e sostible do monte. Esa mesma promesa incumprida que fai anos realizaba en Pontevedra e manguerita en man xunto a unha fogata o actual presidente galego.
Coa chegada das choivas agora polo menos poderán seguir de vacacións ou irse a ver partidos ao Bernabéu coa conciencia tranquila aqueles altos cargos da Xunta aos que non lles altera que se arrase o monte mentres o lume non lles toque os seus cotos de caza ou o ‘fin de semana’ da leira. Galicia xa non arde, pero por desgraza sempre cheira a chamusquina.
 

As conquistas do 15-M

Xoves, 20 de Outubro, 2011

O movemento 15-M non deixa indiferente a ninguén e a demostración de forza do sábado, na que indignados dunhas mil cidades do mundo saíron á rúa a esixir cambios nun sistema político e económico que cren fracasado, seguro que faría reflexionar aos que só viron nel unha algarada inducida desde os partidos de esquerda para desprestixiar a esa dereita da que non están tan afastados. Con todo, as protestas, acampadas e caceroladas de pouco serven se os que deben resolver os problemas non cren nas solucións que lles expón a rúa. Quizá por iso o 15-M debería ir, como ocorre no xogo do Risk, conquistando territorios un a un, centrando a súa forza para que unha vez se acade un cambio, se traballe en reivindicar un novo punto. Porque a diferenza dunha revolución contra un goberno ou un ditador, esta revolta global desátase en sociedades con poderes adquisitivos, nivel de benestar ou perspectiva de crecemento diferente, aínda que tamén cun denominador común, a capacidade de control dos mercados sobre o poder político.
 
A campaña contra os desafiuzamentos é un bo exemplo da forza que ten o movemento e que, de lograr un cambio legal, multiplicaríase e achandaría o terreo para tratar de conseguir outro territorio. Estratexia e constancia para que o 15-M non acabe, como lles ocorría aos personaxes daquela película, atrincheirado en Kamchatka.