Archivo de Xuño, 2008

Petróleo galego

Xoves, 5 de Xuño, 2008

Non sei se Fernando Blanco quería emular a Mad Max na procura de combustible para o seu vehículo ou se só tentou responder con retranca á posibilidade de volver a facer prospeccións petrolíferas en Galicia, como xa o tentara un dos antecesores no cargo, o ferrolán Juan Fernández, alá polo ano 1993, sen ningún éxito e provocando nas contas do departamento un burato duns 6 millóns de euros. “Aínda se acabou de pagar o crédito no 2005”, dixo o conselleiro de Innovación para xustificar que aventuras deste tipo teñen o seu risco. Naquela anterior febre do ouro negro, desde a Xunta ata se calculaban os beneficios para a comunidade en caso de facerse realidade o achado: corredoiras convertidas en autoestradas, servizos públicos gratuítos e se cadra ata limusinas para os conselleiros.
O final xa o coñecemos e nin Manuel Fraga acabou tratando cos xeques da OPEP e por algunhas autovías proxectadas daquela aínda seguimos esperando. Agora, malia que o do petróleo segue a ser un negocio rendible, sempre que se atope, o que está a pedir a sociedade son investimentos en enerxías renovables e campañas para reducir o consumo ou utilizar o transporte público, e iso tamén custa cartos, pero neste caso a aposta é máis segura, aínda que iso si, non dá lugar a facerse moitas ilusións. Vai ser que o petróleo galego segue a estar nas súas rías, nas explotacións gandeiras ou na industria textil ou do automóbil. O resto son como as contas da leiteira.

Cheo, por favor

Domingo, 1 de Xuño, 2008

A frase máis común das estacións de servizo, que ata deu título hai anos a unha teleserie, supón hoxendía todo un risco para o noso peto se nos atrevemos a pronunciala diante do gasolineiro. Porque se encher un depósito nos custaba de media hai uns meses 50 euros, agora podemos chegar a pagar ata 80, e sempre que utilicemos o combustible normal, sen ningún aditivo desdes que as petroleiras nos publicitan dicindo que lle dan un mellor rendemento ao motor. Rendemento alo menos a eles si que lles da nos seus balances de beneficios.
Pero se a escada de prezos do crú estalle a dar unha labazada aos cidadáns, que xa empezan a usar con máis xeito os seus turismos, hai sectores aos que a suba do gasóleo estaos literalmente afogando, como o transporte ou o sector primario, xa que na súa conta de resultados hai un forte incremento do gasto sen que iso se reflexe nunha suba de tarifas ou prezos nos produtos que venden.
Os primeiros en botarse á rúa están a ser os pescadores, xa que ao ter o combustible subvencionado no tramo impositivo a suba do crú estalles repercutindo porcentualmente en maior medida. A Mariña de Lugo, que económicamente depende en gran parte deste sector, acolleu as primeiras manifestacións para dar a voz de alarma tanto pola propia suba do petróleo como pola entrada de pescado importado de menor calidade e a prezo moi baixo, advertindo así de que se non se toman medidas córrese o risco de enterrar definitivamente un modo de vida para moitas familias.
Pero malia que as protestas piden unha solución a uns gobernos que se exculpan por estar condicionados polas directivas europeas, o certo é que agricultores e pescadores tamén están criticando o papel das grandes distribuidoras de alimentación, que controlan o 80% do mercado e cobran o produto ata un 500% máis do que pagan en orixe. Din que ademais están a aplicar a suba do combustible sen que logo llelo abonen a eles, polo que finalmente os únicos afectados pola crise son o produtor e o consumidor, pero nunca o distribuidor.
Algo está a fallar e o propio mercado non é quen de regular unha suba do prezo do combustible e se cadra é aí onde debe intervir a Administración, porque se sabemos que, como din xa os expertos, o petróleo non vai voltar nunca máis aos niveis de hai un ano, é unha irresponsabilidade cruzarse de brazos e esperar a que comecen a saír á rúa pescadores, gandeiros, agricultores, camioneros, taxistas…